Rev 10 | DOB | STEP | 'Enega wate 'ebweu anilose waiwaina galewega 'iebuebusima ya'itena, ta pwanega 'ie'oama, ta ulele debana 'itoolo sakowasiyena, ta maninina 'ana 'ita 'atuwa sinala, ta wate 'aena sinamanamala 'atuwa kaiwe sabelulu.

Revelation of John 10

Anilose 'ebweuna ma ina pwepwai

1 'Enega wate 'ebweu anilose waiwaina galewega 'iebuebusima ya'itena, ta pwanega 'ie'oama, ta ulele debana 'itoolo sakowasiyena, ta maninina 'ana 'ita 'atuwa sinala, ta wate 'aena sinamanamala 'atuwa kaiwe sabelulu. 2 Anilose nina nimanaya pwepwai nadigega gimibuki, ta gidalina, 'igiyaina ta neyaneyasina, 'enega 'iebusima ga 'ae 'ataina olaya 'iasaena, ta 'ae gegeumina bale'uya. 3 'Enega 'enana sinabwanega 'ibwau, 'ana nono nadigega laiyoni 'ibwaubwau. Ta ni'atu 'ina bwau 'igumwala ga wepalala 'adi yau sebeni 'ina ona sie'isena. 4 Wepalala nidi 'enadi yanonodi ga ni'atu be ya'etoladidi, ta galewega 'enana yanonona 'eguya 'igwae, “Wepalala 'enadi site sebeni 'unonodiya 'uda kwaiyedi, ta geya'abo 'u'eto'etoladidi.”

5 'Enega anilose nina tauna ya'itenaya ola be bale'u 'ediya 'itootoolo, nima 'ataina 'igitu'eyena galewaya, 6 ga 'isawa tamatamana Yaubada 'ana esanega, tauna miyamiya atayana, ta wate tauna galewa ta yage maibo'adi solanaya, ta wate bale'u ta yage maibo'adi solanaya, ta wate ola be yage maibo'adi solanaya, 'adi tomweluluwa. Ta anilose nina 'igwae, “Ni'atu tuta 'iapwesama, 7 manuna 'abo anilose esebenina 'ina yoguli 'imu'ei, Yaubada 'ina nuwena kwaikwaiyidi maibo'adi 'ida losalonidi, to'ase nadigega 'ina topaisewao taudi palopitao lowa 'ediya 'isimanena.”

8 Ta 'enana nina galewega yagimi nononaya wate 'eguya 'ionaona, 'igwae, “'Utauya be pwepwai nina neyaneyasina anilose nina 'itootoolo olaya be bale'uya nimanega 'u'ewa.” 9 'Enega yatauya ga anilose nina 'ena pwepwai nina yasidena. 'Enega pwepwai nina 'i'ebwa'egu ta 'ieonegu, 'igwae, “Bobo'ana, 'u'ewa be 'u'a'ani. Ta 'abo 'utonei, 'etamo 'ana dalele gamwamuya 'ulotoo, ta esi 'awamuya 'ana lotoona dibidibina, 'atuwa mu'awa.” 10 'Enega pwepwai nina ya'ewena ga ya'enina, ta 'awaguya yalotoona dibidibina, 'atuwa nadigega mu'awa, ta ni'atu yatonena ga gamwaguya yalotoona dalele yaita.

11 Ta wate 'eguya 'igwae, “'Ilobwenena be 'oyo Yaubada 'ina onao bodao be 'ebeloinao be 'enanao be kiniyao manudi 'uda simana limanedi.”